يارب سامحنى

انا منزلتش بوست من مده بس بجد كان مزاجى مش حلو وانا بحب اكتب فى البوست حاجه حاسس بيها وتلمسنى فعلا بجد بقالى حوالى اسبوع كده مش فى المود خالص

رغم انى مع كل اصحابى والبيت عندنا عادى مش باين عليه حاجه يعنى
بس انا حاسس انى مش مبسوط وانا عارف الاسباب واولها طبعا نفسى وعلاقتى مع ربى
ومكدبش عليكم اشياء كمان مش هوجع دمغكم بيها

المهم انا هتكلم عن موضوع شغلنى واظن اننا كلنا محتاجينه
نفسى مش اعصى ربنا خالص
نفسى اكون بجد كويس زى ما انا باين مع الناس ملتزم وكويس
اكون كده مع ربنا بجد مع نفسى

تخيلوا ان المعاصى بتاعتنا دى هى سبب كل المشاكل اللى بتحصل لينا بجد
وحاسس انى انا السبب فى اللى بيحصل لنا فى مصر وللمسلمين بسبب المعاصى بتاعتى
اه بجد الغلاء والظلم وعدم نصرة المسلمين

هل انا السبب يارب ؟
هل معاصى خلواتى السبب ؟

تعالو اتكلم معاكم فى المعاصى شويه وقول لكم اللى فى قلبى

سال أنس ابن مالك السيده عائشه
فقال يا أماه متى تحدث للارض الزلزله
فقالت يابنى تحدث الزلزله اذا كثر شرب الخمر واذا ظهر الزنا وانتشرت المعاصى
قال الله تعالى للارض تزلزلى بهم
فقال انس اعذابا لهم يا أماه
فقالت بل رحمه وموعظه للمؤمنين ونكالا وسخطا على الكافرين
فعلا كل ده موجود ولو مكناش بنشرب خمر ولا بنزنى
فاحنا بنعصى

قال رسول الله صلى " اذا ظهرت المعاصى فى أمتى عمهم الله بعذابه"

بجد عايزين نسيب المعاصى
ومش نتهاون بها ونقول دى معصيه صغيره .. مش مشكله .. هو ايه اللى هيحصل .. وبجد احنا بنعمل معاصى كتير بنتهاون بيها

انا اول واحد بيرتكب المعاصى وبقول هو انا عملت حاجه دى بسيطه يا عم كبر دماغك

هضرب مثل عليه
لما اكون مشغل اغانى مثلا ودخل عليه حد من اقاربى معروف عنه انه كويس وملتزم
انا محبش اشغل الاغانى امامه هل علشان مش ابان وحش امامه .. او يغير فكرته عنى .. هل علشان بحترمه جدا
فهو ام الله يا محمد !!! بجد انا وحش قوى قوى قوى

يقول حبيبنا رسول الله صلى " اياكم ومحقرات الذنوب فإنهن يجتمعن على الرجل حتى يهلكنه"

يقول انس بن مالك " انكم تعملون أعمالا هى أدق فى أعينكم من الشعره كنا نعدها على عهد النبى من الموبقات

وهذا من الصحابه فما بالنا لو رأى ما نفعله نحن مش عارف كان قال ايه ... تخيلوا كده هيقول عن ايه ولا ايه ولا ايه
سلم يارب وارحمنا

اقرأ الكلام الجاى ده واشعر بيه مش قرائه بس
لو تعرف تقرأه بقلبك اقرأه

يقول بن القيم
ياصاحب الذنب اياك ان تأمن عواقب الذنب
لا تتصور ان الذنب الذى ترتكبه سيمر دون عقاب
وفرحك بالذنب وانت تفعل الذنب اشد عند الله من الذنب
واذا فرحت انك قدرت على ذنب فارتكبته اشد واصعب عند الله من ارتكاب الذنب
وضحكك وانت تفعل الذنب ولاتبالى بنظر الله اليك اشد عند الله من الذنب
وحزنك على فوات الذنب اشد عند الله من الذنب
وحرصك على ان تستر نفسك وانت تفعل الذنب ولا يضطرب قلبك لنظر الله اليك اشد عند الله من الذنب
وقلة حيائك من الملك الذى يكتب اعمالك اشد من الذنب

والله انا فعلت كل ما هو اشد من الذنب ... فيارب اغفرلى وارحمنى

حديث قدسى
انا الله لا اله الا انا اذا اطعت رضيت وان رضيت باركت ... وبركتى ليس لها منتهى
وان عصيت غضبت وان غضبت لعنت ... ولعنتى تصل الى السابع من الولد

يقول الرسول صلى " ما نقص رزق الا بمعصيه "

كلنا طبعا عارفين قصة الامام الشافعى
شكوت لوكيع سوء حفظى ... فارشدنى لترك المعاصى
وقال لى ان العلم نور ... ونور الله لايهدى لعاصى



من اصعب الكلام اللى لمسنى وبجد بخاف جدا جدا جدا لما اسمعه او اقرأه

هانوا عليه فعصوه ولو عزوا عليه لعصمهم

هانوا عليه فعصوه ولو عزوا عليه لعصمهم

هانوا عليه فعصوه ولو عزوا عليه لعصمهم

بجد كل لما افكر فى الكلام ده معقول اعز على الله فيعصمنى
طب ليه انا بذنب معقول هنت على الله بجد انا خايف قوى
ويارب ارجوك ان اكون ممن اعز عليك فتعصمهم يارب يارب يارب


وعازين نخاف جدا من معاصى الخلوات
طيب احنا كلنا بنعمل المعاصى فى الخلوات
بس المقصود انك كل لما تكون لوحدك تعصى ربنا بصفه مستمره

يارب أرزقنا خشيتك فى السر والعلانية

بجد انا كتبت الكلام ده وهو كل كلمه فيه عليه انا
وانا المفروض مقلش الكلام ده لأنى مش أهل حتى انى اقوله او اكتبه
بس انا قلت اكتبه جايز احس على دمى ... معقول هقول للأحبائى واخوانى الكلام ده ومش هعمله ونفذه
بسال الله انى بعد كتابة هذا الموضوه بجد أعز عليه فيعصمنى

وطبعا مش عايز اخلى الحياه مظلمه
ولكن بقول ان دى طبيعه فينا اننا نعصى
وهذا من رحمة الله علينا ... انه التواب الرحيم
ربنا فعلا بحبنا وعايز يدخلنا جنته بس احنا اللى بجد لم نعطى لله حقه وخشيته
يارب ما فعلت ذنوبى لقلة خشيتى او لعدم مبالاتى ولكن لضعف نفسى الاماره بالسوء

فرجائى من الله ان يتقبل توبتى وتوبتكم

بعد لما هتخلص قرائه تعالوا نعزم ونقسم بالله ونعزم على التوبه

وان يارب سنجاهد انفسنا والشيطان على البعد عن المعاصى

قال تعالى

" إن الله لا يغير ما بقوم حتى يغيروا ما بأنفسهم "

صدق الله العظيم

اللهم لا تؤاخذنى بما يقولون

وأغفر لى ما لا يعلمون

واجعلنى خير مما يظنون